📍 中環雲咸街63號巴力大廈1樓
⏰ 星期一至五 12:00-15:00 / 18:00-00:00
⏰ 星期六、日及公眾假期 12:00-00:00
🛒 Foodpanda / Deliveroo / 外賣自取
相信有睇杜汶澤喱騷YellopenRice節目嘅朋友,都唔會對東歐餐廳陌生。東歐餐廳係一間正宗嘅烏克蘭餐廳,夜晚去仲有一杯Vodka送(而家政府唔畀送),仲未book到位嘅就睇住我地現場直擊先啦😆 (政府搞到佢地book位都要暫停埋😡)
馳名基輔炸雞扒 $188
呢個係嚟到東歐餐廳必試嘅菜式,雞肉入面包住奶油再成嚿拎去炸,食嘅時候配埋芝士醬汁食,外面炸得好脆,而入面嘅雞肉就好滑同好有肉汁,中間嘅奶油雖然無流心嘅效果,但個奶油味就好出。伴碟嘅薯片唔係好脆嗰隻,佢有啲似長洲嗰啲支棍好長卷吓卷吓嗰啲薯片,好有薯仔味,食極都唔厭🤩
俄國宮廷焙鹿肉 $228
由於差唔多全場人都係睇完YellopenRice去食,所以基本上個個都係叫火魔法豬肋骨,但如果我哋又推介大家食呢兩樣,大家不如睇返喱騷算啦😑 所以我地揀咗呢個特別啲嘅菜式。呢味鹿肉用石頭鍋上,食到尾嘅時間啲汁都仲係滾緊,鹿肉肉質同羊肉有啲似,有幾嚿比較乾啲,有幾嚿就比較腍啲,但都幾鬆軟。成個感覺有啲似紅酒燴牛腩,個汁入面有啲薯仔,甜甜地幾香幾好食~
招牌芝士焗牛脷盅 $98
本來我哋想叫個湯,但又唔想叫YellopenRice介紹嗰個羅宋湯,如果又一樣大家真係可以唔使睇我哋🤪 於是見隔離枱有個似酥皮湯嘅嘢,一問原來唔係湯,係焗牛脷,我哋就叫咗嚟試喇。個酥皮唔係好似酥皮湯嗰啲咁薄,都唔係篤落去食。上菜嘅時候比我地影完相,侍應就幫我地將塊酥皮成塊揭開,再剪開幾份,食法就係將個牛脷擺上酥皮度食,好似迷你pizza咁。牛脷勁厚,腍腍地有少少入口即溶嘅感覺,同埋又係食極都仲有,好似百寶袋咁🤣
整體嚟講,食物質素好高,喺中環嚟講食到呢個質素嘅東歐餐都算抵,而且份量都幾大,餐廳環境好似置身於東歐咁,不過見到侍應們都做到好忙,香港人真係好強勁🥳