📍 慈雲山毓華街74-80A號嘉華大厦地舖
⏰ 星期一至三 07:00-17:00
⏰ 星期四至日 07:00-20:00
🛒 外賣速遞 / 外賣自取

掃咗幾日街都要食返正餐，今次帶大家嚟到呢間告過急嘅街坊茶記，去完一次就會明點解要告急，因為真係超抵食！相信每個餐加一兩蚊都唔會有街坊反對🤪 25蚊早餐有包有麵有嘢飲，你唔係咁都唔撐呀嘛？ 快啲衝上慈雲山食窮佢哋啦！

醒晨早餐 $25

花生醬菠蘿包+迷你雪菜肉絲米粉 

$25係「早起的鳥兒價」，平日9點半後同埋星期六日同假期8點半後要貴3蚊，但都好抵啦😆 平時好少將花生醬擺落菠蘿包度，要用牛油做菠蘿油先無咁乾，但八道嘅花生醬菠蘿包又ok喎，而個「迷你」米粉都絕對唔迷你！米粉係好幼嗰啲，雪菜肉絲嘅粉量都好多😚

評分⭐️

（5⭐️為滿分）
味道 ⭐️⭐️⭐️⭐️
環境 ⭐️⭐️⭐️⭐️
抵食 ⭐️⭐️⭐️⭐️⭐️

📍 葵涌廣場3樓TOP世界3069-T8號舖
⏰ 15:00-21:30
🔒 星期二休息
🛒 Foodpanda / 外賣自取

繼續葵廣三樓TOP世界系列！五一黃金週再加埋天馬行動，大家食咗幾多黃店呢😆 想食多幾間就要跟住我哋去食喇，前兩日食完小食同甜品，今晚帶大家遊泰國🇹🇭

泰式傳統奶茶 $24

$24飲到呢杯勁夠味嘅泰奶茶又唔多冰真係好抵🤩 小編仲加咗$5加埋寒天，一粒一粒勁有咬口！泰讚了同光榮冰室同九份茶舍組成咗個奶茶聯盟，拎住泰讚了嘅收據去光榮同九份飲嘢會有半價㗎～

評分⭐️

（5⭐️為滿分）
味道 ⭐️⭐️⭐️⭐️⭐️
抵食 ⭐️⭐️⭐️⭐️⭐️

📍 葵涌廣場3樓TOP世界3069-T5-T6號舖
⏰ 13:00-22:00
🛒 Deliveroo / 外賣自取

點樣可以喺一日之內食最多黃店？答案就係去葵廣喇，一餐十間黃店其實唔難！3樓TOP世界係葵廣最多黃店嘅地方，如果開舖喺TOP世界而又唔係黃店都真係會拍烏蠅。食完一轉熟食再返上三樓食埋甜品先走就fit晒啦～

雲呢拿布丁燒🍮 $38

小編喺日本成日都會去便利店買個布丁食，有次仲食過布丁三文治，從此就愛上咗😍 呢個布丁燒用咗北海道Cream Cheese，底層係蛋糕，加埋淋咗焦糖醬，簡直係三重層次嘅口感。呢度招牌嘅味道係椰青味，小編下次仲想試埋豆腐味🤪

良心事跡💛

評分⭐️

（5⭐️為滿分）
味道 ⭐️⭐️⭐️⭐️⭐️
抵食 ⭐️⭐️⭐️⭐️

📍 新蒲崗寧遠街3-23號越秀廣場地下G01號舖
⏰ 11:00-22:30
🛒 Whatsapp/電話落單 外賣自取 61756118

今次介紹呢間係一間今個月新開張嘅黃店，叫思想共鳴，呢個名嘅由來係同路人經過呢場運動搵到思想同行嘅手足，亦都感受到聲音共鳴嘅美好，所以就叫「思想 共鳴」。餐牌有意粉有Risotto有鰻魚飯有生蠔，如果唔係林鄭嘅話佢哋仲有wine賣，照顧晒唔同喜好嘅手足🥰

原條烤鰻魚炒飯 $98

我哋今次先試吓呢個鰻魚炒飯，原本無睇清楚唔知係炒飯，上菜嘅時候見到個飯咁足料真係幾驚喜🤩 飯入面有粟米有洋蔥有冬菇仲有啲瓜粒，幾有咬口，啖啖都有唔同嘅配料入到口，唔怕悶😗 條鰻魚唔係勁厚肉勁煙韌嗰隻，有啲似小編之前喺大阪食嘅鰻魚，薄薄地但燒得好香。98蚊有杯茉莉花茶飲仲要唔收加一，算係幾高質素😛

一路食飯嘅期間好似聽咗個方皓玟演唱會咁，餐廳個喇叭由如果想我哭播到人話😂 店內本來有塊黑板畀人寫吓字，但業主叫佢哋要去除板上面啲字。小編喺佢地擦之前都影低咗張相留念，黑板上嘅字擦得走，但我哋內心嘅信念永遠不死。

良心事跡💛

👉🏻 店外曾有黑板供同路人寫上字句
👉🏻 寄賣與運動有關的物品

評分⭐️

（5⭐️為滿分）
味道 ⭐️⭐️⭐️⭐️
環境 ⭐️⭐️⭐️⭐️⭐️
抵食 ⭐️⭐️⭐️⭐️

📍Instagram: @miff.i

媽媽節近了，你們應當慶祝！加上根據非正式統計，5月入面日日都有人生日，要買蛋糕都有唔少網店黃店可以揀架～今次推介呢間叫miff.i嘅IG網店！

5吋芒果芝士流心凍餅 $228 （母親節期間$198）

芒果嘅香味真係隔住個盒都聞到！蛋糕上面嘅芒果砌到成朵花咁，一個蛋糕要用2-3個呂宋芒，小編食嘅塊塊都好甜好香，朋友就食到有一兩塊酸酸地，之不過成個蛋糕都無添加糖，芒果有甜有酸先夠原汁原味呀嘛😝 仲非常之健康！ Cheese Cake就食到啖啖芝士味，餅底厚少少會好啲，睇住流心流出嚟嘅芒果汁流出嚟真係好治癒🤩 蛋糕5吋大，適合3-4人食，加上有天然水果，一家人食就啱晒～

雖然幾時都話芒果係甜品界嘅馬德鐘（aka萬能key），但key落cheese cake仲要流埋心，真係key得幾夾！媽媽節期間買仲會加送媽媽節牌架～

建議大家買嘅時候要帶個保溫袋，同埋要雪一雪先食，仲要即晚食呀因為新鮮芒果唔擺得耐。拎蛋糕嘅話都幾方便，店主會喺黨鐵站沿線嘅站外交收，等大家一定識路！要買蛋糕就快啲搵佢哋啦～

良心事跡💛

👉🏻 捐錢給星火及立場
👉🏻 部分蛋糕款式有與抗爭運動有關的牌

📍 元朗建業街98號滿利大廈地舖
⏰ 星期日、二至四 16:00 – 00:30
⏰ 星期五至六 16:00 – 01:30
🔒 星期一休息
🛒 Foodpanda / 外賣自取

一講去元朗食甜品，大家一定只會諗到Blue仔涼粉，但我而家鄭重咁話你知：錯呀！錯呀！錯呀！ 如果有個自稱元朗人要帶你食Blue仔，你一定要同佢割蓆，因為佢一定係假扮元朗人！你要再帶返佢去黃店食，小編介紹呢間同Blue仔只有5分鐘之隔嘅金糖滿屋，但佢哋4月30日就結業，要去就快！

芒果女皇 $49

呢個甜品有芒果、芋圓、西米、椰果同埋芒果汁底，芒果汁底唔係好甜，但嗰半個芒果就好香！啲西米係大粒西米，大過西米露嗰啲，椰果甜甜哋，幾正🤪

椰皇水 $18 

如果食甜品食夠50蚊，只要加10蚊就飲到，杯椰皇水同喺花園街買即開嗰啲係一樣咁好飲架！！！一定要試！

椰皇甜品都幾出名，大家都可以試吓～我哋由夜晚10點食到11點幾都無乜客，反而雖然Blue仔少咗枱，仲有唔少人去食同埋買外賣。希望大家可以喺佢哋結業前都支持吓啦🥺

良心事跡💛

👉🏻 店內有文宣
👉🏻 罷市

評分⭐️

（5⭐️為滿分）
味道 ⭐️⭐️⭐️⭐️
環境 ⭐️⭐️⭐️⭐️
抵食 ⭐️⭐️⭐️⭐️

📍 葵芳葵富路7號葵涌廣場地下A48B號舖
⏰ 11:00-21:00
🛒 Foodpanda / UberEats / 外賣自取

根據黃藍地圖，葵廣有20間黃店，咁多間黃店，揀邊間食先好呢？今次香港人Foodie帶大家去一間早排出現喺告急黃店list度嘅手卷店啦 😆

葉問4 （松葉蟹膏、軟殼蟹、虎蝦、蟹子） $45

「葉問生Cancer->去美國幫個仔搵學校->打歧視中國人嘅美國人，再返香港教詠春⋯⋯」相信呢個情節大家都耳熟能詳，但大家應該係無睇過套戲嘅。

小編一去到見到「葉問4」呢個名，就好好奇想試下，6件卷都係軟殼蟹卷，3件上面有蟹膏，另外3件就有隻虎蝦。飯入面嘅軟殼蟹可以脆少少，配埋蝦喺卷上面都好match，另一款嘅蟹膏份量好大！

而食完之後，小編都係唔明個卷同葉問有咩關係嘅，不過睇睇下餐牌原來仲有「葉問」、「葉問三」、「問后」等等嘅食字名，可能同舖頭名有關啦🤔 下次試埋😆

良心事跡💛

👉🏻 店內有文宣
👉🏻 罷市
👉🏻 賣酒精搓手液

評分⭐️

（5⭐️為滿分）
味道 ⭐️⭐️⭐️⭐️⭐️
抵食 ⭐️⭐️⭐️⭐️

📍 屯門湖翠路138號啟豐園商場地下25號
⏰ 11:15 – 21:00
🛒 deliveroo / 外賣自取

寶島位處於啟豐商場，係屯門碼頭區啲中學生嘅青春回憶！呢間小店都幾有性格，睇佢哋Facebook成日都話忽然休息，食到食唔到唔係靠彩數，大家食之前睇吓佢哋Page喇😂

特選日本鰻魚窩燒飯 $88

小編承認今次係嗌貴咗嘅，不過都係嗰句，小編真係鍾意食鰻魚呀嘛🤣 呢個鰻魚飯唔係普通鰻魚飯咁簡單，佢仲係窩燒飯，即係個石窩熱住，啲痴喺窩邊嘅飯會燶燶地脆脆地。塊鰻魚擺得幾靚，無乜碎骨，係唔錯嘅～不過講真，去啟豐呢啲平民商場仔應該食返經濟啲好，40幾50蚊都有烏冬、炒飯、麵線等等嘅嘢食揀～

良心事跡💛

👉🏻 罷市

評分⭐️

（5⭐️為滿分）
味道 ⭐️⭐️⭐️⭐️
環境 ⭐️⭐️⭐️
抵食 ⭐️⭐️⭐️⭐️