📍 北角蜆殻街6-16號寶榮大廈地下F號舖
⏰ 07:00-21:00
🛒 Foodpanda / 外賣自取

📍 屯門龍門路45號富健花園地下40號舖
⏰ 06:00-02:00
⭕️ 6月7日晚上10時結束營業
🛒 Foodpanda / 外賣自取

屯門店進入最後三日倒數😭 小編早兩日再去多次，7點就開始大排長龍，長到個店員行出嚟望到都「哇」咗出聲。佢勁好人咁問排緊隊嘅顧客要唔要水，未落單已經feel到家嘅溫暖🥰 事不宜遲，即刻為大家介紹閨•家最好食嘅幾味餸！

咖喱豬扒飯 $48

上回講到早餐試過豬扒，都係嗰句，豬扒薄切得嚟啲香茅味超重勁入味，煎得好香🤩 今次撈埋少辣咖喱汁一齊食，咖喱都無蓋過豬扒嘅香茅味，個咖喱雖然係少辣但其實都唔辣，仲有好香好濃嘅椰汁味！撈飯一流！

手剁香煎蓮藕餅飯 $46

係小編一生食過最好食嘅藕餅，平時喺酒樓或者喺超市雪櫃買嗰啲都好實，但閨•家嘅藕餅真係一食就食到係手剁，係細個媽媽煮嘅肉餅嘅感覺，啖啖都食到蓮藕條，勁有咬口但又比較腍身，好想再食呀😭

慢煮豬軟骨飯 $48

用咗咖喱汁撈飯就用唔到豬軟骨個汁撈😂 呢碗豬軟骨睇落平平無奇但入面真係痴咗線咁好食，平時食豬軟骨係一嚿肉連住一嚿軟骨，呢度係肉+筋+軟骨。啲豬軟骨炆得幾腍同好入味，腍到好似食緊和牛咁🤪

老火湯

每碟飯都會跟碗迷你嘅老火湯，小編食嗰日係木瓜雪耳南北杏煲排骨，無味精得嚟好清甜，因為係迷你嘅關係所以碗湯得兩嚿紅蘿蔔跟，都幾好😗

嗱以上就係小編覺得閨•家最正嗰三味，如果你哋唔認同就唔該親身去試完再話我知。屯門牛呀唔好話我唔提你哋呀，要食就快啲去喇，屯門搭車出北角唔係咁簡單架😏

評分⭐️

（5⭐️為滿分）
味道 ⭐️⭐️⭐️⭐️⭐️
環境 ⭐️⭐️⭐️
抵食 ⭐️⭐️⭐️⭐️⭐️

📍 天水圍天瑞路9號天瑞街市T46號舖
⏰ 07:00-20:00
🛒 外賣自取

一講去天瑞街市覓食，大家可能會即刻諗到輕鐵軌旁邊嗰堆畀人掃街嘅食肆，但喺街市嘅另一端入口，有間唔起眼細細間嘅粉麵舖，企喺門口嘅老闆（定係店員？）睇落好惡但一開聲就好溫柔🤭 喺天水圍呢啲所謂新市鎮搵到啲好食嘅潮州粉麵舖真係難得😝

鮮蝦雲吞麵 $30

細細碗麵有5粒雲吞，雲吞一粒一啖都食到而且入面好足料，不過塊皮就唔算薄⋯⋯入面嘅蝦細細隻勁彈牙，豬肉亦都唔多，質素都算高。而個麵都好彈牙同無鹼水味，唔錯！

評分⭐️

（5⭐️為滿分）
味道 ⭐️⭐️⭐️⭐️
環境 ⭐️⭐️⭐️
抵食 ⭐️⭐️⭐️⭐️

📍 土瓜灣譚公道65號地下D號舖
⏰ 11:00-23:00
🛒 Foodpanda / Uber Eats / Lingduck落單 / 外賣自取

這一個下雨的夜晚，你是否正在空閒？我此刻仍留在土瓜灣，想著未來怎麼辦。只希望沙中線的那個站，可以起得更慢，再貴的租黃店已不能負擔⋯⋯ 茶渟係其中一間曾經告過急嘅黃店，啲嘢飲真係好高質，包你哋一試難忘呀😝

布蕾蛋糕珍珠奶茶 $25

個餐牌畀好多嘢遮住咗，勁難搵😂 小編就喺推介個menu度揀啦。為咗可以自欺欺人唔好飲得咁肥，就唔揀黑糖系列揀咗呢個布蕾蛋糕珍珠奶茶。因為來貨問題，黑糖珍珠都變晒黃金珍珠。面嗰層cream好似好肥但令到杯嘢飲落好滑，一飲就成口都蛋糕味，好似真係食緊件cake咁！啲珍珠都好新鮮好彈牙，仲係熱嘅，所以要攪勻佢攪到凍返先好飲呀！

評分⭐️

（5⭐️為滿分）
味道 ⭐️⭐️⭐️⭐️⭐️
抵食 ⭐️⭐️⭐️⭐️

📍 九龍城打鼓嶺道23號百營中心地庫至1樓
⏰ 星期一至五 12:00-15:00 / 18:00-23:00
⏰ 星期六日 12:00-23:00
🛒 Foodpanda、外賣自取

Sawadee Kha🙏🏻 嚟到九龍城一定要食泰國菜🇹🇭 今次介紹黃珍珍泰國菜館，呢間喺泰菜嚟講都算高級餐廳，適合成家人一圍枱咁食飯。餐廳裝修到好泰國，連個厠所都係泰式厠所，好似置身暹羅一樣！

珍珍推介6人餐 $1688

冬蔭公湯

👉🏻 講泰菜大家都一定第一樣諗到冬蔭公，但唔係人人識解咩叫「冬蔭公」，冬蔭（Tomyum）喺泰文係解「湯」，而「公」喺泰文就係解「蝦🦐」，所以冬蔭公係一定有蝦嘅！呢煲湯唔係好辣，入面有勁多蝦，仲有啲草菇等等嘅配料，真係「湯好飲」呀🤣

金柚大蝦沙律

👉🏻 作為頭盤都幾開胃！酸酸哋嘅柚子配埋啲無殼嘅蝦，啱晒懶人😂

小食拼盤

👉🏻 呢個拼盤有魚餅、蝦餅同蟹餅，小編特別推介魚餅，呢度嘅魚餅同平時食嘅有啲唔同，中間魚肉部分比較腍，仲有無嗰種泰菜好常見嘅死辣。

什錦串燒沙爹

👉🏻 6串串燒有豬牛雞，啲肉唔會燒到乾晒，點埋甜甜哋嘅沙爹汁都幾正，係曼谷night market嘅風味🤩

泰式南乳燒雞

👉🏻 燒雞無乜特別，度度食燒雞都係咁，特別喺個醬度！南乳醬點雞真係第一次，又幾夾喎！

泰式明爐蒸烏頭

👉🏻 明爐蒸魚又係必食，啲魚嘅肉好質，又有啲脂肪，食落去唔會好似無食過嘢咁，中意食魚嘅人一定會中意呢個蒸烏頭！

咖喱炒蟹+法國麵包

👉🏻 呢個係成個set最驚喜嘅一味餸😝 隻蟹超大隻，啖啖肉。最正係個咖喱都有蟹羔嘅味道，用嚟點法國麵包真係超夾！

鮑汁螺片炒椰菜苗

👉🏻 塊螺片唔係嗰啲假嘅鮑片，係真係螺片，仲要超大塊！啲菜索埋啲鮑汁真係出色！

馬拉盞炒通菜

👉🏻 呢一味就真係無特別喇，喺中式大排檔都食到差唔多味道。

泰式甜品

👉🏻 有細細粒芒果糯米糍，有西米糕，仲有兩件大菜糕。芒果糯米糍入面係真芒果肉，西米糕有椰汁味、芝麻味同埋咖啡味。本來以為大菜糕會無味所以成枱都無人想食😅 但一食落口有淡淡椰香，估佢唔到咁正！

總括嚟講，成餐飯都係高級嘅，但價錢喺泰菜嚟講都非常高級。所以如果兩三丁友去九龍城食泰菜，可以試吓呢度嘅炒粉同炒飯，PART 2再講！

評分⭐️

（5⭐️為滿分）
味道 ⭐️⭐️⭐️⭐️
環境 ⭐️⭐️⭐️⭐️⭐️
抵食 ⭐️⭐️⭐️

📍 油麻地廣東道838號金冠樓地下
⏰ 11:30-21:15
🛒 外賣自取

只要細心搵，九龍都有唔少角落有好嘢食，今次呢間連google map都search唔到，行過龍都唔知咩事😂 竹地小館喺碧街同廣東道交界，啲餃子同麵都好抵同好好食！快啲去試！

蔥油雞扒麵 $30

呢個係撈麵，所以配埋一碗湯同一嚿白蘿蔔，碗湯同去茶餐廳飲嘅例湯差唔多，撈麵乾嘅話可以倒少少落去，嚿白蘿蔔好清甜～ 雞扒超厚肉，煎到個面脆脆地，肉質都好鮮嫩～ 撈麵好彈牙，頭兩啖覺得無乜味，原來啲蔥油味喺個底到😛 撈返勻就好食啲，但蔥油味都係再重味啲會好啲😝 

招牌菜肉湯餃（8粒） $30

餃入面係椰菜同豬肉，好足料！椰菜好爽口，多菜少肉幾健康～ 其實煎餃可能仲好食，不過為咗保持健康嘅身體都係唔好食咁熱氣😚

評分⭐️

（5⭐️為滿分）
味道 ⭐️⭐️⭐️⭐️
環境 ⭐️⭐️⭐️
抵食 ⭐️⭐️⭐️⭐️⭐️

📍 屯門龍門路43號龍門居商場地下91號舖
⏰ 星期一至四 11:30-21:15
⏰ 星期五、六、日及公眾假期 11:30-21:30
🛒 Foodpanda、OpenRice預早落單、外賣自取

龍門居革命街多嘢食就真係係人都知，呢間「犇道」喺未有黃藍之前已經好出名，屯門真係有唔少專食呢類燒牛嘅黃店，唔怪得街上面啲牛唔見晒🤪

慢燒極上牛排丼 (150g) $98

小編預先喺OpenRice落單，去到餐廳拎飯先畀錢，都幾方便！嚟到犇道無可能唔試慢燒牛排，牛燒得幾香幾腍，150g都夠食～ 篤爆隻蛋加埋啲粟米一齊食都幾fresh！不過啲飯就爛咗啲，聽人講平時堂食都有呢個問題，希望會改善啦！

評分⭐️

（5⭐️為滿分）
味道 ⭐️⭐️⭐️⭐️
環境 ⭐️⭐️⭐️⭐️
抵食 ⭐️⭐️⭐️⭐️

📍 荃灣川龍街8號
⏰ 14:30-01:00
🛒 外賣自取

大良鴻輝記係一間傳統中式糖水舖，我哋今次先試吓佢哋嘅燉鮮奶啦～

大良燉鮮奶 $22

大良係一個喺中國廣東嘅城市，燉鮮奶好出名～ 鴻輝記嘅燉鮮奶同中國嘅有少少唔同，中國用水牛奶，鴻輝記就用咁澳洲全脂奶。個燉鮮奶燉得幾滑，有奶味但奶味唔重，唔係好甜仲好似有啲苦，有啲啲失望……下次試埋招牌三寶芝麻糊、合桃糊同埋杏仁糊先～

評分⭐️

（5⭐️為滿分）
味道 ⭐️⭐️
環境 ⭐️⭐️⭐️⭐️
抵食 ⭐️⭐️⭐️⭐️

📍 荃灣青山公路275號富裕樓地下G4-6號舖
⏰ 11:30-23:00
🛒 外賣自取

講到平價嘅韓國菜，如果你去開荃灣你應該唔會唔識韓閣～ 韓閣由間細舖搬咗去力生地下間大舖，位多咗坐得舒服咗，食物就依然出色！

牛肉拌飯 $52

拌飯好抵食！入面有一隻蛋，有芽菜同蘿蔔等等嘅配料，加啲擺喺枱面嘅醬撈埋一齊就好有韓國味道～

亞之媽炸雞 – 蜂蜜牛油味（半份） $108

好掛住韓國嘅橋村炸雞🤩 橋村最好食就係蜂蜜味所以就叫咗蜂蜜牛油味喇！半份炸雞總共有5件，有一隻翼加兩隻髀，髀就好似KFC咁再分兩嚿，炸雞熱辣辣，皮脆肉嫩，不過個蜂蜜牛油味就唔係好出😖

大韓無骨豬手（例） $88

就算只係例牌都有好多件～豬手個汁好香同甜甜哋，不過豬手塊皮同啲肉就分開咗，豬手旁邊仲有生菜、泡菜、醃蘿蔔等等，可以用塊生菜包住一齊食～

上湯牛排餃 $13 .

新店開張有個小食優惠，啲小食原本已經特價咗再半價真係勁抵！原價25蚊3隻餃而家13蚊就食到，最抵嘅小食只要8蚊就有4件🤑 牛排餃好香牛肉味好足料～

因為搬咗新舖，除咗有小食半價優惠，舊客戶首次惠顧就會拎到雙倍印花，而新客戶食滿100蚊就會送一支天然薰衣草酒精搓手液🤫

評分⭐️

（5⭐️為滿分）
味道 ⭐️⭐️⭐️⭐️
環境 ⭐️⭐️⭐️⭐️⭐️
抵食 ⭐️⭐️⭐️⭐️

📍 北角蜆殻街6-16號寶榮大廈地下F號舖
⏰ 07:00-21:00
🛒 Foodpanda / 外賣自取

📍 屯門龍門路45號富健花園地下40號舖
⏰ 06:00-02:00
⭕️ 6月7日晚上10時結束營業
🛒 Foodpanda / 外賣自取

閨•家喺炮台山嘅舖頭上咗杜汶澤喱騷節目YellopenRice之後多咗人認識，不過告過急嘅屯門店撐唔住了，佢哋會喺6月7日夜晚10點結束營業，屯門牛要把握機會去食豬扒同飲無味精老火湯😭

歐陸早餐 $40

因為想試塊豬扒，但又唔想食麵，所以叫咗最貴嘅歐陸早餐。歐陸早餐有招牌豬扒、牛乳炒滑蛋、餐肉、薯餅、粟米同埋蒜蓉牛油厚多士。豬扒係薄切，不過薄切都有薄切嘅好，香茅味超重勁入味，煎得好香！蒜蓉牛油厚多士都有某pizza藍店蒜蓉包嘅味道，蒜蓉超濃！食完都唔會勁口渴，無味精真係唔係浪得虛名😝 仲未試到個老火湯，6月7之前一定會再試😭

閨•家屯門店個位置講真都有啲難搵，小編特登整咗個地圖比大家😂

餐廳牆身佈置好有童真，好有小時候家的感覺🏰

評分⭐️

（5⭐️為滿分）
味道 ⭐️⭐️⭐️⭐️⭐️
環境 ⭐️⭐️⭐️
抵食 ⭐️⭐️⭐️⭐️

📍 深水埗福華街149號地舖
⏰ 07:30-23:00
🛒 Deliveroo / 外賣速遞 / 外賣自取

深水埗有好多間粉麵舖，標記樂園真係一間隱世嘅超正粉麵舖🤩 標記樂園喺旺角都仲有間舖，旺角嗰間主打小菜打冷，深水埗呢間就主打粉麵～

標記新鮮牛三寶河 $48

一個餸嘅牛腩/牛雜/牛筋/牛肚河就$35，$48滿足到三個願望都算抵食～碗麵唔係求其畀每樣一樣就算，係好足料！牛腩係超超超好食，肥瘦好均勻，又滑又淋😍 牛筋好大嚿又有咬口～ 湯底係腩汁，但唔係好濃，唔會食到成口味精咁難頂。蔥同炸蒜另外擺咗喺隻羹度，可以按個人喜好倒落個麵度～

評分⭐️

（5⭐️為滿分）
味道 ⭐️⭐️⭐️⭐️⭐️
環境 ⭐️⭐️⭐️⭐️
抵食 ⭐️⭐️⭐️⭐️