hoeng1 gong2 jan4 foodie
📍 旺角通菜街2A-2P號鴻光商場地下2J號舖
⏰ 11:30-22:00（星期日休息）
女人街嘅兩旁都好多餐廳，多到唔知點揀好，跟住小編去搵好食的店就唔會中伏啦！
1個餸就28蚊，然後每個餸加$7，講真車仔麵食到呢個價都算貴，但喺旺角呢啲地方都唯有默默接受。魚肉春卷喺餐牌上面有隻手指公，咁就試吓啦🤣 其實即係腐皮包住魚肉，有兩條，一條粗啲一條無咁粗，好香魚肉味都唔會過鹹～ 豬大腸都幾厚身，但因為中間都多脂肪，咁就叫埋蘿蔔啦清清地🤪 蘿蔔堅係清甜無楂，有四嚿～ 油麵同其他車仔麵舖食開嘅好似有啲唔同，陣味無咁重同幼身啲～ 腩汁都香牛腩味，唔錯！
（5⭐️為滿分）
味道 ⭐️⭐️⭐️⭐️
環境 ⭐️⭐️⭐️⭐️
抵食 ⭐️⭐️⭐️⭐️
📍 尖沙咀柯士甸路15A柯士甸大廈地下D舖
⏰ 12:00-16:00 / 18:00-21:30
以前成日笑人講咩隱世咩極邪惡，呢一年就真係發現好多隱世嘅小店，啲嘢食真係邪惡到你唔信！舖位細細嘅東京食堂，食物真係超水準！不過排隊要排好耐，好食就唔緊要啦😝
由於好細間舖，所以可以睇到條條鰻魚經過熊熊烈火百度高溫去燒，仲睇到廚師燒鰻魚好鬼死認真嘅樣🥰 條鰻魚幾肥美，性價比都幾高！有飯有湯有中華沙律仲有蕃茄仔再加海量粟米粒，真係大滿足😚
細細塊炸得幾香，外脆內軟，入面有濃濃嘅蟹味，讚！
（5⭐️為滿分）
味道 ⭐️⭐️⭐️⭐️⭐️
環境 ⭐️⭐️⭐️
抵食 ⭐️⭐️⭐️⭐️
📍 旺角界限街36號1-2樓
⏰ 12:00-21:00
太子嗰頭嘅角落搵到呢間高兩層嘅餐廳，行過都會畀外面同入面嘅霓紅燈裝飾吸引住，嚟芳華絕代食飯除咗可以打卡影港女相，食物質素都幾高㗎！
金邊粉炒得幾香！配豬頸肉都幾唔錯，因為平時都係食開蝦～ 辣椒同花生碎分開咗擺，都係慣常做法，大家可以跟自己口味去撈啲落個麵度。記住記住，Pad Thai一定係甜嘅，呢度嘅Pad Thai絕對喺水質之上！
黃咖喱醬香得嚟唔係好辣，軟殼蟹索晒啲咖喱味所以都好夾，真係會想不斷不斷食！不過個咖喱醬就食唔返蟹味，但都ok啦！
呢個生蝦蝦尾個殼喺抆出嚟嗰陣，蝦肉同蝦殼都仲係痴住，證明都唔係勁新鮮，但味道ok嘅！
小編叫呢杯係叫This Town Needs Beer，ABV 5.2%，78蚊一杯。睇個名就知啱晒今日嘅香港⋯⋯杯酒有水果同茉莉花茶香味，喺咁壓迫嘅社會環境底下都真係需要忘我咁放鬆吓，飲返杯冰凍易入口嘅啤酒⋯⋯
（5⭐️為滿分）
味道 ⭐️⭐️⭐️⭐️⭐️
環境 ⭐️⭐️⭐️⭐️⭐️
抵食 ⭐️⭐️⭐️⭐️
📍 西環石塘咀山道39號地下
⏰ 12:00-23:00
HKU嘅朋友有福了！水街多嘢食就係人都知，但山道都一樣有唔少隱世美食！雖然出咗地鐵站要上少少斜路先到，不過食完覺得係值得嘅！學生去食仲有10蚊優惠，最平48蚊就食到個lunch，抵到爆啦😆
其實可以將幾個餐合拼埋一齊討論，因為細心睇個lunch menu就會發現係幾款煎扒自由配搭飯、意粉、薯蓉定係漢堡，除咗漢堡之外都可以自選醬汁🤪 煙鴨胸唔可以夾漢堡，貴啲嘅就係牛肉漢堡同安格斯西冷。試咗4款煎扒，覺得煙鴨胸係最驚喜！佢係一嚿未切嘅煙鴨胸，入面肉質仲係勁鮮嫩，腍腍哋嘅！本來以為係遇先切定勁榎嗰啲，所以都有啲surprise🥳 豬扒仲大塊嗰塊漢堡包，又係好鮮嫩，夾埋包一齊咬仲有肉汁爆出嚟！魚柳同雞扒都無乜特別。汁都唔太特別，芝士醬好濃味但有少少鹹。薯蓉幾creamy，好香薯仔味，大讚👍🏻 餐前個湯係甘荀南瓜湯，覺得稀咗啲，一般。
見啲餐牌發現夜晚有乳豬食，真係急不及待想再去試試啊😝
（5⭐️為滿分）
味道 ⭐️⭐️⭐️⭐️
環境 ⭐️⭐️⭐️⭐️
抵食 ⭐️⭐️⭐️⭐️⭐️
📍 紅磡寶其利街53號寶利閣地下10號舖
⏰ 12:00-23:00
夏天出街真係熱到搞唔掂，行幾步路就會口渴想飲杯嘢，但日日珍珠奶茶嘅話就會越嚟越肥，越肥就會越怕熱，到時就返唔到轉頭🤢 所以要飲就要飲得健康啲，鮮果汁夠晒健康啦😝
呢杯係mix埋菠蘿、熱情果同埋青檸，酸酸哋又唔係好甜就最解渴！睇住佢喺雪櫃度拎啲生果擺晒落個攬拌機度，攬完就凍落杯真係幾治癒😗 杯果汁唔係好凍因為無加冰，將水果嘅原汁原味留住。如果唔話畀我知呢杯有咩生果，我一飲就會飲到菠蘿同熱情果味，青檸味要留到吞咗再dap真啲先dap到，夏天飲杯真係唔錯㗎😆
（5⭐️為滿分）
味道 ⭐️⭐️⭐️⭐️
抵食 ⭐️⭐️⭐️⭐️
📍 葵涌廣場3樓TOP世界T28號舖
⏰ 12:30-21:30
葵廣3樓TOP世界入面有條黃店食街，最近有間新黃店加入！佢哋係賣燒物同飛碟嘅，睇佢哋個名就知佢哋煮嘢食非常有態度😆 btw老細係利物浦fans，買完嘢食記得恭喜佢隊波終於拎到英超冠軍🏆
揀完食咩之後要揀咩汁，有日式燒汁、秘製沙爹汁、酸酸地柚子汁同原味鹽燒4款做法選擇，小編就揀咗酸酸地嘅柚子汁，好似會開胃啲😗 個盒都擺得幾靚，唔係求求其其裝埋一袋搞到唔知點影相嗰啲🤪 首先試牛舌，超高質，入面勁腍！但因為一條脷都有唔同部位，所以大約一半腍一半無咁腍。鰻魚都係腍嘅，唔係勁韌咬唔開嗰啲，燒到好入味。而鵝肝擺喺餅乾上面食都唔錯，食得出法國餐廳幾百蚊一餐嘅味道，之後睇返佢哋IG先發現兩位老細喺法國菜餐廳做過，其中一個仲去過法國學廚！不過最最最驚喜嘅竟然係送嗰兩隻蝦😝 雖然唔大隻，但燒完都好爽口，蝦尾仲係離殼嘅，證明啲蝦唔係啲擺到霉晒嘅劣質嘢。
食完更加feel到佢哋對食物嘅執著同態度，每一嚿食物都feel到燒嗰位朋友嘅心機，黃色經濟圈就係需要呢啲高質黃店，你哋已經令到葵廣嘅食物質素門檻大大提高🥳 佢哋今日6月28號正式開張，一定要長做長有呀！
寫到佢哋咁好，為免大家誤會一定要利申返：唔係打手，真金白銀買㗎！ 😤
（5⭐️為滿分）
味道 ⭐️⭐️⭐️⭐️⭐️
抵食 ⭐️⭐️⭐️⭐️⭐️
📍 深水埗大南街202號
🗓 即日至7月5日 （6月29日及7月1日休息）
⏰ 星期一至四 12:00 – 19:00
⏰ 星期五至日 12:00 – 20:00
今次介紹兩個喺深水埗Parallel Space嘅展覽，地下係《香港定格》新書發佈及原畫展，上一層就係《茫——記》攝影展覽。
《香港定格》係Don Mak一本紀錄香港當下尋常景致嘅畫集，主要喺2018年創作，到反送中運動期間再增補兩幅插畫。睇返2018年嘅畫作，同今日香港有平行時空嘅感覺，雖然一切一切都返唔到轉頭，但可以喺畫作之中睇返香港百花齊放好靚嘅一面。
而《茫——記》攝影展覽就展出攝影師Deacon Lui嘅作品，上層嘅空間較暗，漆黑嘅環境令觀眾靜靜哋思考同回想過去一年發生嘅事，大部分作品都係離焦，展示出茫然回首嘅困惑，展覽嘅影片部分，更會勾起呢一年傷痛嘅回憶。
兩個展覽都有紀念品同作品集賣，大家可以帶定錢去支持一吓！
📍 IG: @aroundtheworldhk
小編喺IG發現咗間新嘅網店叫aroundtheworldhk！呢間網店暫時淨係賣肉桂卷，有原味、杏仁味同阿華田味。最緊要最緊要係所有材料都喺外國買（中國除外），咁就食得開心又放心啦😆
第一次試緊係要試原味，試真啲個肉桂味先！真係未打開就聞到陣肉桂味，由於小編好心急想同朋友分享，無拎返屋企先叮熱嚟食，所以第一啖食落去有少少乾，但個麵包味係好夠！食第二啖就食到啲醬，啲醬同個包融為一體又唔錯喎！成件肉桂卷唔係好甜，因為原來用嘅牛油同鹽都減咗半，幾健康😝
📍 九龍灣宏通街1號啟福工業中心1樓8室
🗓 即日至6月28日
⏰ 下午2時至晚上10時
💰 20元 / 10元（主辦工會會員優惠）
小編再介紹一個非常值得去嘅展覽畀大家，即日去到星期日晚（6月28日）大家都可以去九龍灣睇吓「明日香港」體驗式展覽！呢個展同一般畫展好唔同，人面除咗有好熟悉嘅畫而同物品，仲可能會搵到好陌生嘅感覺⋯⋯展覽分為「回顧」、「重組」同「決擇」三大主題，由於呢個係體驗式展覽，所以唔講太多，留畀大家自己去體驗！
行完展覽仲可以買啲紀念品！主辦單位表示，入場費同埋賣紀念品收益扣除活動成本同工會營運成本後，會捐去612人道支援基金。
📍 葵涌廣場3樓TOP世界T16, 17號舖
⏰ 12:00-21:30
👉🏻 荃灣元朗屯門天水圍粉嶺旺角黃埔新蒲崗西環灣仔西灣河都有分店！
齊柏林又開分店！今次小編又嚟到葵廣TOP世界搵食，淨係呢個area都又多咗兩間新嘅黃店！齊柏林開喺chok雞隔離，快啲去食高質熱狗啦😝
呢款熱狗有芝士、煙肉、菠蘿、千島醬同埋紐倫堡腸！一食落口就食到食火炙壽司嗰陣味，即係燒過嘅芝士😗 煙肉好大粒，芝士下面嘅菠蘿食落幾fresh，紐倫堡腸係白色嗰隻腸，幼啲嘅，同食開紅色嗰啲唔同，幾特別😝 加12蚊可以轉做套餐，可以喺飲品同小食之中任揀兩款。不過小編就寧願留肚幫襯多幾間黃店，因為葵廣實在太多太多美食😆
（5⭐️為滿分）
味道 ⭐️⭐️⭐️⭐️⭐️
環境 ⭐️⭐️⭐️⭐️
抵食 ⭐️⭐️⭐️⭐️
香港人Foodie