FooDo

📍 旺角通菜街1A-1L號威達商業大廈地下C號舖
⏰ 12:00-22:00

FooDo係藝員林秀怡Kirby同朋友喺女人街開嘅餐廳，主打手製麵同手製薄餅。Kirby上年6月表態支持反送中運動，之後畀TVB雪藏。一齊睇吓佢間餐廳有咩好食啦😝

忌廉汁日本魷魚及菠菜葉配手製意大利意粉 $121

而家食完睇返個menu先發現原來有手製闊麵同手製意大利粉，手製闊麵都係90幾蚊但手製意大利粉就要$121。碟意粉嚟到嘅時候覺得好細碟，都驚唔夠食，但一食就發現條意粉好有質感！煙煙韌韌又粗身，仲有好濃嘅芝士味，好鍾意啲菠菜葉索晒啲芝士汁一齊食，仲有好多嚿魷魚圈同魷魚鬚，芝士汁一早索晒落意粉同啲配料度，唔會水汪汪。呢個味道真係喺FooDo先食到，芝士汁令到個麵即使份量少，但都好夠飽，強烈推薦大家去試🤩

跟餐會送一杯飲品，小編揀咗凍水果冰茶，唔係好甜，幾fresh幾開胃～

良心事跡💛

👉🏻 由林秀怡開辦，林秀怡支持反送中運動

評分⭐️

（5⭐️為滿分）
味道 ⭐️⭐️⭐️⭐️⭐️
環境 ⭐️⭐️⭐️⭐️⭐️
抵食 ⭐️⭐️⭐️⭐️

轉角

📍 屯門屯利街1號華都商場1樓2-3號舖
⏰ 12:00-22:00
🔒 星期一休息
🛒 外賣自取

介紹屯門華都黃店嘅系列都就嚟去到尾聲喇，今次我哋帶大家去尖茶樓上嘅轉角～轉角lunch嚟講蛋包飯都幾受歡迎，外賣自取仲有85折！

滑蛋蒲燒鰻魚飯（原條） 外賣$94

呢個餐係lunch menu最貴嗰個，堂食要$110，但小編真係超喜愛食鰻魚，所以無計啦🤪 條鰻魚真係幾長，燒得幾香，但尾嘅位都幾多骨。上面有大堆紫菜絲，呢樣都要擺入中伏外賣個list度😂 啲紫菜焗住同埋畀個盒蓋壓住，所以連埋啲鰻魚汁痴埋咗一齊 ，佢同啲飯中間隔咗層滑蛋，所以啲飯無畀鰻魚汁搞到變晒質～

柚子紅茶

有紅茶味又有柚子味，底度有幾條柚子咬吓，成杯柚子紅茶唔係好甜，幾清新，唔錯～

外賣85折真係令轉角嘅呢個餐牌更加吸引，50幾蚊就可以外賣意粉或者蛋包飯返屋企慢慢食😝

良心事跡💛

評分⭐️

（5⭐️為滿分）
味道 ⭐️⭐️⭐️⭐️
環境 ⭐️⭐️⭐️⭐️⭐️
抵食 ⭐️⭐️⭐️⭐️

無糖不歡

📍 大角咀利得街14號家慶樓地下
📆 4月18日最後一天營業
⏰ 15:00-03:00（4月18日）

無糖不歡聽日係最後一日營業了，相信好多去食過嘅手足都會好唔捨得。無糖不歡最出名嘅就係手作糖不甩，最後一日大家要把握機會去試喇！

單身貴族 $28

話明單身就緊係6隻味都無朋友（好食到無朋友），碟上面有6隻碗仔，每隻碗仔上面都有一粒糖不甩，顧客可以喺原味薑汁、黑糖鐵觀音、朱古力、芒果、咖啡、抹茶、奶茶同香芋8隻味入面揀走兩隻唔要嘅，小編就無要到朱古力同咖啡味。有「甜品萬能key」之稱嘅芒果非常入味，香芋同薑汁都好正，奶茶味嗰粒我食到就嚟吞先食得出個奶茶味🙈 抹茶嗰粒上面有啲紅豆，好有食日本甜品嘅感覺，抹茶味未算好濃但都算入味。黑糖鐵觀音就擺咗喺先食最後一粒，可能個味蕾已經畀5隻味影響緊，所以食到黑糖味但唔太feel到鐵觀音。整體嚟講呢份甜品細細份，但包含咗好多隻味道，真係一次過滿足6個願望😆 推介薑汁、芒果同香芋味😋

評分方面，今次係香港人foodie玩評分以嚟第一次畀晒滿分，我哋將15粒星星送畀無糖不歡每一位嘅手足，希望你哋生活愉快，最緊要身體健康！後會有期！煲底見！😚 

良心事跡💛

評分⭐️

（5⭐️為滿分）
味道 ⭐️⭐️⭐️⭐️⭐️
環境 ⭐️⭐️⭐️⭐️⭐️
抵食 ⭐️⭐️⭐️⭐️⭐️

孖寶小館

📍 上水新成路109號地下
⏰ 07:30-22:00
🛒 Foodpanda / Deliveroo / 外賣自取

唔知大家仲記唔記得香港人Foodie好耐之前整合過幾個早餐post呢？做新界東做到上水嘅時候發現有早餐嘅黃店唔多，當時見到孖寶小館覺得喺一個咁近中國嘅地方有間西餐早餐真係好難得。但光陰似箭日月如梭時移勢易，孖寶小館附近已經多咗幾間唔同嘅早餐選擇，今次先帶大家食孖寶小館啦～

燒牛肉班尼迪蛋配多士 $37

班尼迪蛋英文係Egg Benedict，英國人好鍾意食，仲係復活節嘅應節食品，通常係金記豬柳強嗰塊包+煙肉+水煮蛋。孖寶小館呢個就將多士代替咗豬柳強塊包，煙肉嘅部分就轉咗做風乾火腿、燒牛肉或者煙三文魚，小編就揀咗燒牛肉。食Egg Benedict最精彩就係篤爆隻蛋嗰吓，一篤！篤唔爆嘅！原來小編太溫柔，再大力少少就爆咗，小編都影唔切呢個咁神聖嘅時刻😂 塊燒牛肉都算厚，有啲黑椒喺個邊邊度，幾有咬口同幾香。不過沙律上面啲黑醋汁就少咗啲啲。

熱泡沫咖啡 +$10

幾好飲，但泡沫咖啡竟然無拉花😭 不過拉花又唔重要嘅，咁忙邊得閒慢慢拉😂

食完早餐之後小編睇過吓啲正餐餐牌，發現啲正餐都幾抵食，有飯有意粉有扒鋸，大家可以去試吓😆

良心事跡💛

👉🏻 7月12日提供餐廳作遊行水站

評分⭐️

（5⭐️為滿分）
味道 ⭐️⭐️⭐️⭐️
環境 ⭐️⭐️⭐️⭐️
抵食 ⭐️⭐️⭐️⭐️

潮成園手打魚蛋大王

📍 旺角通菜街109號地舖
⏰ 08:00-05:00
🛒 Foodpanda / 外賣自取

五香牛什河粉 $27

從來無諗過喺旺角可以用少過30蚊食到一餐，直到有一日行過通菜街，見到潮成園招牌大大隻字寫住「全場粉麵20元起」，抵食得嚟仲要係黃店！

講得20元「起」，就緊係唔係樣樣粉麵都20蚊，但最高級嘅潮式粉麵餸「崩沙牛腩」都只係$35！魚蛋、魚片頭、牛筋丸、墨丸同埋小編今次介紹嘅牛什都係必食之選，大家可以去試下啊 😝

良心事跡💛

👉🏻 放選民登記表
👉🏻 老闆親自向黃藍地圖admin表明立場
👉🏻 好鄰舍北區教會良心食店互助計劃參與店舖
👉🏻 2月3日起一連五日醫護半價

評分⭐️（5⭐️為滿分）

味道 ⭐️⭐️⭐️⭐️
環境 ⭐️⭐️⭐️⭐️
抵食 ⭐️⭐️⭐️⭐️⭐️

LC Tea

📍 屯門鄉事會路112-140號雅都商場Go Go Mall
⏰ 12:30-21:45
🛒 Foodpanda / Lingduck / 外賣速遞 / 外賣自取

📍 屯門湖翠路168-236號海趣坊1樓22-23號舖
⏰ 12:00-21:30
🛒 Foodpanda / Lingduck / 外賣速遞 / 外賣自取

原來屯門都有唔少手搖飲品小店，除咗有上次講過嘅尖茶同好耐好耐之前講過嘅茶星人同埋已經出晒名嘅九份茶舍，今次先同大家介紹嘅LC Tea。LC Tea有兩間舖，兩間都喺屯門，分別喺海趣坊同Go Go Mall。

芝士普洱皇 中杯 $28 

因為疫情嘅關係，小編決定外賣杯茶返到去先慢慢飲，廢事喺街度除低口罩飲嘢啦，點知返到去，杯芝士奶蓋茶由兩層變咗三層，分別係奶蓋、奶茶同茶🤣 中間嗰層溝埋溝到好夾，搞到試唔真個普洱味，個奶蓋嘅濃度同鹹度都滴中，係小編試過幾間手搖飲品小店之中最好嘅芝士奶蓋～

小編中伏了

仲有呀仲有呀，兩間LC Tea都可以用Lingduck 落單，大家可以試試！再講個秘密畀大家知，雖然小編成日都喺屯門出沒，但朋友同我講Go Go Mall呢個名，之前我都要load一load先諗到，明明一直都叫開雅都商場😂 Go Go Mall樓上有好多間黃店㗎，遲啲帶大家試晒佢😆

良心事跡💛

👉🏻 罷市
👉🏻 有文宣
👉🏻 參與「黃親國斥」計劃及「黃色商界聯署」

評分⭐️

（5⭐️為滿分）
味道 ⭐️⭐️⭐️⭐️
抵食 ⭐️⭐️⭐️⭐️

泰國佬

📍 大埔廣福道127號地舖
⏰ 12:00-00:00
🛒 Foodpanda / Deliveroo

呢幾日twitter上面都滿佈泰國同中國互串嘅meme，小編決定今日都要喺香港stand with泰國，搵間泰式黃店食吓🤪

泰式蛋包金邊粉 $78 / 冬蔭公湯 / 泰式奶茶 （特飲+$12） /

賣相唔錯，蛋包金邊粉上面有三隻蝦。有樣嘢真係好想控訴一吓，就係食親泰國菜，碟麵或者飯都勁大碟，我諗三個人食兩碟先啱份量🤕 講返個padthai，padthai雖然係橙色，但其實係唔辣嘅，甚至有啲甜，麵嘅質地好煙韌，旁邊有啲花生碎同有個青檸可以自由選擇溝埋一齊，想食辣都可以喺枱面度加啲辣粉。 麵入面有芽菜、蔥、豆乾等等嘅材料，仲有啲蝦米，啲蝦米令到個麵好有咬口，幾得意，而三隻蝦就無乜蝦味。

唔好睇個湯好似好紅，其實都唔係好辣，個辣味去到喉嚨就無咗，真係好想叫多一煲嚟飲🤪 （應該唔得）

之前都講過泰式奶茶加好多冰係因為杯嘢好甜，泰國佬嘅泰式奶茶唔係好甜，又少冰，飲得出泰茶茶葉獨有苦苦地個味同奶味。

良心事跡💛

👉🏻 曾參與好鄰舍飯卷計劃
👉🏻 大埔遊行日提供水同食物

評分⭐️

（5⭐️為滿分）
味道 ⭐️⭐️⭐️⭐️
環境 ⭐️⭐️⭐️
抵食 ⭐️⭐️⭐️⭐️

牛蓋

📍 屯門屯利街1號華都商場地下55號舖
⏰ 12:00-22:00
🛒 Foodpanda / 外賣自取

又又又係屯門🤪 之前已經介紹過好多間喺華都嘅黃店，今日介紹呢間小編一早就好鍾意食，平心而論就真係唔係款款都鍾意食，不過如果你識揀就一定話正🥳

極上牛蓋飯 $130

小編之前試過牛肉蓋飯同埋牛扒蓋飯，兩款都唔錯，但未去到「哇好正呀🤩」嘅感覺。牛肉蓋飯似吉X家嘅牛肉飯，小編覺得呢個一般，但經濟啲🤑 而牛扒蓋飯就係極上牛蓋飯嘅初級版。極上牛蓋飯真心犀利，同牛扒蓋飯嘅分別係多咗隻蛋同多咗啲沙律醬，牛扒蓋飯係用牛肩押，而極上牛蓋飯就係用牛小排。極上嗰個個肉質滑啲同淋啲，好有牛味。飯嘅底有塊大生菜，索埋啲燒汁食都幾正😋

牛扒蓋飯同極上牛蓋飯都可以揀牛嘅份量，但小編覺得150g細嘅份量都夠食了。$130嚟講食到呢個質素嘅燒牛肉小編覺得都ok，如果想食平啲食牛扒蓋飯就80蚊都有找。食完仲可以去尖茶買杯嘢飲，如果個肚仲有位都可以上一層心思思買啲小食😛

良心事跡💛

👉🏻 5/8休市
👉🏻 派水

評分⭐️

（5⭐️為滿分）
味道 ⭐️⭐️⭐️⭐️⭐️
環境 ⭐️⭐️⭐️⭐️
抵食 ⭐️⭐️⭐️⭐️

新景園咖喱小廚

📍 灣仔春園街20號地舖
⏰ 星期一至六 11:00-15:00 / 18:15-21:00
🔒 星期日休息
🛒 Deliveroo / 外賣自取

新景園嘅咖喱一向出色就好多人都知，連護旗手譚詠麟以前都係常客，喺10月逢星期四黃店感謝日興起之前，因為有人向傳媒爆料指老闆娘為咗良心唔做麟伯生意，成為咗早期嘅「懲罰」對象。當時仲未開香港人foodie account嘅小編心諗：「唉⋯⋯呢間又唔使食啦⋯⋯實大排長龍😔 」最近終於到小編懲罰了！仲未食過嘅就睇吓新景園塊豬扒有咩特別同有啲咩要注意啦😆

咖喱豬扒飯 $85 / 套餐跟菜及例湯（或汽水） +$10

你以為95蚊食個dinner好貴咩？你可能睇到個銀碼會覺得好貴，但由碗湯一到，一飲落口你就知呢餐唔簡單😚 湯係雪耳雞湯，呢個湯可以一飲到底連渣都食埋，因為佢除咗湯水之外就淨係得雪耳同雞肉，細細碗湯雞肉都有幾嚿！湯水仲無味精，唔會飲到好想再叫嘢飲。

到碟飯同碗咖喱汁嘅時候，我諗你絕對唔會再對95蚊呢個價錢有所質疑，仲會覺得抵到爛。豬扒係即叫即炸，上菜嘅時候好熱，咖喱汁同啲飯都只係暖暖地。豬扒佔隻碟嘅大約八成位置，飯就有碗半飯左右嘅份量，咖喱汁入面有嚿大薯仔，唔係稀框框嘅，辣辣地好惹味，好彩個汁唔熱，如果唔係真係辣死。塊豬扒就真係一試難忘，個面炸得好脆，豬扒唔係瘦嘅豬扒，基本上每嚿都有啲脂肪，肉質鮮嫩鬆化仲勁多肉汁多到咇出嚟，外脆內軟。

最後講埋碟菜，平時喺屋企都無食咁多菜，菜心好清甜，加埋啲豉油真係一流🤩

最最最後，小編細細聲講個秘密畀大家知⋯⋯其實小編唔係好食得辣🥵 食咗幾啖咖喱之後就有杜汶澤去跑馬地燒房焗食燒雞翼嘅感覺，平時小編可能會辣到放棄，不過由於塊豬扒同個咖喱汁真係好食到不得了，唯有將我嘅少少心得話畀大家知，等唔食辣嘅手足都可以食新景園咖喱食到舐舐脷😋

唔食辣手足食新景園全攻略♨️

1️⃣ 揀汽水唔好揀湯 👉🏻 雖然湯好好飲，但你食唔到辣就唯有犧牲一吓，如果你每食一啖咖喱就飲一啖可樂，你會舒服好多，而你都未必會未食完就飲晒，因為支可樂係大玻璃樽裝
2️⃣ 留返一件豬扒最後唔點咖喱食 👉🏻 個豬扒嘅肉汁係足以蓋過殘留喺口嘅咖喱味
3️⃣ 留返半碟菜最後食 👉🏻 就算無晒可樂同豬扒，啲菜心嘅鮮甜同豉油都可以令你感到無咁痛楚
4️⃣ 轉食乾炒牛河 👉🏻 新景園嘅乾炒牛河都好出色，新景園係大排檔起家，聽講河粉炒得唔油，都值得一試 😗
5️⃣ 食完咖喱再去手搖飲品或者甜品糖水黃店幫襯 👉🏻 食多間黃店支持黃色經濟圈🐷 一晚兩間黃店其實唔難 💛💛💛

可能食得辣嘅手足會覺得小編好誇張，不過呢個真係小編嘅弱點嘛🥺 但又聽到有都係食唔到辣嘅朋友話覺得唔係好辣，Openrice直情有人話啲咖喱完全唔辣仲好甜😂 可能我食嗰晚重手咗啦🤨 希望大家唔好同我割蓆，同埋要分享畀唔食辣嘅朋友知🤪

良心事跡💛

👉🏻 拒絕護旗手譚詠麟幫襯

評分⭐️

（5⭐️為滿分）
味道 ⭐️⭐️⭐️⭐️⭐️
環境 ⭐️⭐️⭐️⭐️
抵食 ⭐️⭐️⭐️⭐️⭐️

甜姨姨私房甜品

📍 天后清風街13號地下
⏰ 星期一至四 12:00-01:00
⏰ 星期五 12:00-02:00
⏰ 星期六 15:00-02:00
⏰ 星期日 15:00-01:00
⏰ 公眾假期前夕 12:00-02:00
⏰ 公眾假期 03:00-02:00
🛒 Foodpanda / Uber Eats / 外賣自取

小編今次搭叮叮去到天后（係唔搭黨鐵呀吹咩🥳），試吓呢間叫甜姨姨嘅港式甜品舖，呢間舖以前成日爆場好旺，但因為疫情嘅關係，小編食嘅時候都係得一枱客😭 麻煩手足幫手大大力share等多啲人去試吓甜姨姨嘅甜品😆

芒果大合奏 $50

聽個名就知係將唔同有芒果嘅嘢都擺埋一齊再嚟個crossover，入面有芒果雪糕、芒果蓉、芒果布甸、芒果雪糕，仲有一樣真係諗都無諗過嘅芒果乾～ 芒果乾切絲同埋啲芒果蓉同雪糕一齊食，啲芒果乾好有咬口，個芒果味仲更加突出～

良心事跡💛

評分⭐️

（5⭐️為滿分）
味道 ⭐️⭐️⭐️⭐️⭐️
環境 ⭐️⭐️⭐️⭐️
抵食 ⭐️⭐️⭐️⭐️

使用 WordPress.com 設計專業網站
立即開始使用