📍 九龍城打鼓嶺道23號百營中心地庫至1樓
⏰ 12:00-15:00 / 18:00-23:00 

早排介紹過黃珍珍嘅「珍珍推介6人餐」，有朋友問小編係咪大食到一個人食六人餐🤣 不過我哋已經無咗堂食六人餐嘅自由，今次PART 2就介紹一下限聚令下兩個人去食乜好啦🤪

原個菠蘿炒飯 $118

菠蘿炒飯有大量肉鬆喺面，炒飯入面有腰果同提子乾呢啲泰式炒飯嘅嘢，仲有啲可能好多人都唔鍾意嘅青豆🤯 個菠蘿真係好新鮮，食咗一半炒飯仲可以刨啲菠蘿肉出嚟食，仲好多汁！

泰式炒粉 $108

泰式炒粉即係PadThai，都係嗰句，PadThai最緊要係甜，甜嘅PadThai就係好PadThai，第二緊要就係啲金邊粉要彈牙，黃珍珍嘅PadThai兩樣都做到！

最後總結一吓，味道嚟講真係無得挑剔，不過份量細咗啲。小編覺得食泰國菜可以食平啲啲，反正去到泰國食嘢都係食平民地道風味㗎啦😛

評分⭐️

（5⭐️為滿分）
味道 ⭐️⭐️⭐️⭐️
環境 ⭐️⭐️⭐️⭐️⭐️
抵食 ⭐️⭐️⭐️

📍 天水圍天一商城2樓2011-2013號舖
⏰ 12:00-22:00

話說今次介紹嘅Bello Dining小編都私藏咗幾個月，因為懶所以一直都未出post😂 小編早幾個月去買外賣嘅時候佢哋仲未搬舖，排晒長龍，5月中搬咗去大舖，大家就可以食得舒服啲啦！以前以為天水圍只係得新北江呢啲比較平民嘅食嘢選擇，發現Bello Dining之後勁開心！因為可以用平民價錢食到高質西餐！

鮮茄忌廉墨魚仔意粉 $58

58蚊包埋沙律同飲品，都好抵！沙律用咗日式麻醬，甜甜地幾開胃！話到明鮮茄意粉，無諗過會咁多茄蓉，每一啖都食到茄蓉溝埋甜甜嘅忌廉味🥰 不過買外賣成日都遇到個問題，就係個盒蓋啲倒汗水令到啲食物淡味咗，遲啲疫情無咁嚴重嘅時候試去堂食先😚

評分⭐️

（5⭐️為滿分）
味道 ⭐️⭐️⭐️⭐️
抵食 ⭐️⭐️⭐️⭐️⭐️

📍 大角咀中匯街16號中美樓地下29號舖
⏰ 12:00-23:30（星期六日開17:00，星期四休息）

食正宗泰菜唔一定要去九龍城！極品泰國菜館喺大角咀算係比較靜嘅中匯街，細細間但煮啲嘢都幾有水準！

蝦球炒金邊粉 $78

PadThai呢啲度度都差唔多，我會覺得呢度嘅PadThai普普通通，好食但無乜特別。

魷魚沙律 $78

呢啲泰式沙律通常都幾辣，平時少啲會試魷魚沙律，通常都係食泰式鳳爪🤪 啲魷魚幾彈牙，食親泰式沙律都覺得啲餸識隱身，發現份量都幾多，食極都仲有😂

串燒（牛 / 雞） $15 / $12

燒得啱啱好，鎖得住啲肉汁！牛肉少少少少韌，雞肉滿分，沙嗲汁甜甜哋，非常高水準！

椰汁冰 $28 / 泰式奶茶 $20

嘢飲方面都唔差！椰汁冰好重椰子味，不過泰式奶茶就無其他地方飲嘅咁甜。

芒果黑/白糯米飯 $58

飯後甜品必點！飯係熱嘅，芒果係凍凍地嘅，芒果都幾甜，加埋椰汁食都唔錯！不過真係幾滯，會飽到嫑嫑嘅😛

基本上呢度每枱客都會叫蒜蓉包，但小編開頭唔知佢咁出名所以無叫到，淨係偷影咗隔離枱嗰份，大家如果去嘅話可以試吓呀😝

評分⭐️

（5⭐️為滿分）
味道 ⭐️⭐️⭐️⭐️
環境 ⭐️⭐️⭐️⭐️
抵食 ⭐️⭐️⭐️⭐️

📍 荃灣蕙荃路22-26號綠楊坊1樓F19B號舖
⏰ 11:00-22:00

八粒魚蛋，不解釋喇。

魚蛋（八粒） $10

唔係陳皮魚蛋，係普通嘅魚蛋，都算彈牙。食魚蛋肉質固然重要，但最重要嘅都係個咖喱汁！佢哋嘅咖喱汁好惹味，辣得嚟又唔係超辣，好正！

鮮檸冬瓜茶 $24

真係有塊青檸！飲落去唔係假味，溝埋冬瓜茶都好清新！唔係太甜，夏天飲呢啲都幾舒服！

評分⭐️

（5⭐️為滿分）
味道 ⭐️⭐️⭐️⭐️
環境 ⭐️⭐️⭐️
抵食 ⭐️⭐️⭐️⭐️⭐️

📍 天水圍天湖路1號嘉湖新北江商場1樓C45B舖
⏰ 07:30-22:30

小編成日都早起身去食早餐，因為覺得有早餐嘅morning先係good morning！但諗起聽日開始就無得再喺餐廳嘆完早餐先返工（係呀無WFH呀），真係sad過無得WFH☹️ 今日嚟到呢間係新北江開得最早嘅（好似係），啱晒好早起身嘅小編😝

健怡早餐：秘製炸醬湯米粉 $34

諗咗好耐都唔知點解叫健怡早餐，健怡早餐有包有多兩樣餸揀，加埋杯嘢飲都係34蚊。但港式早餐得個麵同杯嘢飲都要$31。以為炸醬係譚仔嗰啲，點知竟然係譚仔炸醬味加肉絲，幾有咬口。跟嘅煎蛋要擺喺湯米度一齊食！餐肉就好似擺咗一陣咁，凍咗⋯⋯😨

評分⭐️

（5⭐️為滿分）
味道 ⭐️⭐️⭐️
環境 ⭐️⭐️⭐️
抵食 ⭐️⭐️⭐️⭐️⭐️

📍 中環鐵行里6號地舖
⏰ 08:00-18:00 （星期六開11點，星期日休息）

📍 中環畢打街1-3號中建大廈1樓109號舖
⏰ 星期一至五 08:00-18:00
⏰ 星期六 09:00-17:00 （星期日休息）

今次介紹嘅Trois Cafe係喺中環鬧市之中可以靜一靜chill一chill嘅好地方，佢哋有兩間舖，小編去咗鐵行里嗰間，亦都係杜汶澤介紹過嗰間。3月嗰陣話就嚟執，小編7月都仲食到，大家要多啲去支持呀😝

叉燒鬼佬漢堡 $50

叉燒呀！叉燒呀！呢個漢堡入面有炒滑蛋、叉燒同埋甜豉油，雖然唔係煎蛋同無洋蔥，但成個包食落口都幾夾，實在太黯然，實在太銷魂🤩 不過塊叉燒瘦咗啲同埋乾咗啲，如果多返啲脂肪會更好。

Piccolo Latte 迷你拿鐵 $37

Piccolo又稱短笛咖啡，Piccolo Latte同普通Latte嘅分別係細杯一半左右，咖啡大家都係咁多份量，即係Piccolo落少咗奶，亦即係Piccolo嘅咖啡濃度高啲，更加飲得出咖啡豆香。落單嘅時候店員會問想飲fruity啲定nutty啲，十分貼心🥰 而咖啡碟上有嚿甜嘅合桃，如果覺得杯咖啡苦，都可以食嚿合桃舒緩吓～

評分⭐️

（5⭐️為滿分）
味道 ⭐️⭐️⭐️⭐️
環境 ⭐️⭐️⭐️⭐️⭐️
抵食 ⭐️⭐️⭐️⭐️

📍 觀塘開源道60號駱駝漆大廈3座3樓P室
⏰ 11:30-21:30 （星期六日開12點，星期一休息）

都唔知幾時先可以喺餐廳堂食dinner，唔理嚕我哋介紹咗先，你哋bookmark定遲啲去或者叫住外賣先啦😆 今次介紹呢間都係喺駱駝漆3座，呢度長期搭lift都大排長龍，不過3樓就可以行上去當做吓運動！

去到門口覺得幾靚，望入去嘅環境都幾打卡able，覺得無揀錯餐廳了！不過跟住就出事🙄 本來坐低咗喺一張燈光唔錯同張枱都幾靚嘅位，過咗一陣就有侍應叫我哋轉枱，為咗唔好做西客，是旦啦！點知張枱嘅枱面唔靚，變咗光面嘅傢俬飯枱咁，有啲啲唔開心☹️

黑醋汁羊架配薯蓉（跟湯沙律甜品）$198 / 香煎鴨肝伴黑醋汁

好啦唔緊要，其實最重要都係食物🤪 前菜係三文魚蕃茄湯+沙律+一口多士，三文魚湯少少辣同香魚味，真係好好飲，但稀咗啲⋯⋯沙律普普通通，一口多士都幾脆口。羊架有兩件，一件好鬆軟一件就比較韌，都香羊味，推介！鴨肝細細嚿，一路食一路覺得好肥😂 甜品係cheese cake，檸檬味重咗啲啲，都ok。

雜扒薯蓉 $88

羊架餐個前菜一叫就出，雜扒薯蓉過多唔夠一分鐘都出咗嚟，快得有啲奇怪，係快到以為佢係咪畀錯咗我哋🤨 雜扒嘅賣相好一般，係豬肋骨+雞扒+司華力腸，啲肉即叫即上，乾身無乜肉汁。每個餐嘅伴碟都係椰菜同粟米，覺得有點頹，覺得88蚊呢個餐唔係太抵。

荔枝玫瑰梳打/ 藍桔棘萊姆梳打 $39 （跟餐半價）

其實都幾大杯，不過值唔值39蚊就真係見人見智。其中一隻杯係有halloween裝飾，本來覺得幾得意，但睇睇吓發現少咗條眼眉，好恐怖😱

評分⭐️

（5⭐️為滿分）
味道 ⭐️⭐️⭐️
環境 ⭐️⭐️⭐️⭐️
抵食 ⭐️⭐️⭐️

📍 屯門龍門居商場地下105號
⏰ 07:30-21:30
⏰ 龍門富健外送 1000-2030

超鍾意超鍾意超鍾意仙桃居！介紹過佢哋好多好多次，今次試呢個樣衰但好食嘅糧尾餐！記住嚟到仙桃居一定要食米通，因為好環保♻️（可以洗少對筷子）

糧尾餐：鮮茄肉燥撈米通+珍珠奶茶 $45

靚仔靚女一定鍾意食呢個餐（包括小編），平時因為樣靚而得到好多待遇，食返個樣衰嘅餐先平衡到。肉燥勁好食！食到一粒粒肉粒，仲有冬菇同蔥。蕃茄好鮮甜，估唔到蕃茄同肉燥都可以咁夾😆 不過可以外賣焗住，米通焗到淋咗少少，都係堂食好食啲。不過抗疫要緊，沒有堂食只有外賣！

評分⭐️

（5⭐️為滿分）
味道 ⭐️⭐️⭐️⭐️
抵食 ⭐️⭐️⭐️⭐️⭐️

📍 荃灣西樓角路178-184號華都中心地下A2號舖
📍 荃灣西樓角路170-184號華都中心2樓30-60C舖
⏰ 07:30-22:30

森美餐廳嘅地舖喺三棟屋對面，舖位好大所以坐得勁舒服！一路食一路聽住餐廳播嘅粵曲（aka. 粵語流行曲），真係好有歐陸得嚟又好本土嘅感覺。早餐嘅牛角包真係一試難忘！

芝士火腿/滑蛋牛角包+香橙紅茶 $35

先講個牛角包，脆脆的！芝士溶咗喺火腿同牛角包中間，牛角包嘅牛油味超濃，夾埋少少鹹嘅火腿一齊食真係滿足到三個願望🤪 如果唔鍾意火腿都可以揀滑蛋！牛角包都幾大個，長16 cm，早餐食個牛角包加啲沙律菜都夠飽。杯嘢飲就不得了，睇menu有香橙紅茶，以為係求其用啲橙味糖漿再加紅茶，點知原來杯紅茶真係有兩件香橙，仲要唔篤個橙係無橙味，純正嘅天然無添加😚

評分⭐️

（5⭐️為滿分）
味道 ⭐️⭐️⭐️⭐️⭐️
環境 ⭐️⭐️⭐️⭐️⭐️
抵食 ⭐️⭐️⭐️⭐️