Attitude態度燒物飛碟專門店

📍 葵涌廣場3樓TOP世界T28號舖
⏰ 12:30-21:30

葵廣3樓TOP世界入面有條黃店食街，最近有間新黃店加入！佢哋係賣燒物同飛碟嘅，睇佢哋個名就知佢哋煮嘢食非常有態度😆 btw老細係利物浦fans，買完嘢食記得恭喜佢隊波終於拎到英超冠軍🏆

牛舌 $15 / 鰻魚 $20 / 鹽燒法國鵝肝 $24

試業期間買滿$50送你兩隻蝦🦐

揀完食咩之後要揀咩汁，有日式燒汁、秘製沙爹汁、酸酸地柚子汁同原味鹽燒4款做法選擇，小編就揀咗酸酸地嘅柚子汁，好似會開胃啲😗 個盒都擺得幾靚，唔係求求其其裝埋一袋搞到唔知點影相嗰啲🤪 首先試牛舌，超高質，入面勁腍！但因為一條脷都有唔同部位，所以大約一半腍一半無咁腍。鰻魚都係腍嘅，唔係勁韌咬唔開嗰啲，燒到好入味。而鵝肝擺喺餅乾上面食都唔錯，食得出法國餐廳幾百蚊一餐嘅味道，之後睇返佢哋IG先發現兩位老細喺法國菜餐廳做過，其中一個仲去過法國學廚！不過最最最驚喜嘅竟然係送嗰兩隻蝦😝 雖然唔大隻，但燒完都好爽口，蝦尾仲係離殼嘅，證明啲蝦唔係啲擺到霉晒嘅劣質嘢。