《西西弗斯的不撓》畫展

📍 西營盤WeWork（西營盤新街5-13號地下）
🗓 即日至6月29日
⏰ 早上9時至晚上9時

小編weekend食飽黃店之後就去咗西營盤睇呢個叫《西西弗斯的不撓》嘅畫展，如果你有聽開My Little Airport嘅歌，你應該都知西西弗斯係乜水，唔係喺電話投注中心幫馬迷落注嗰個呀，係希臘神話故事受到諸神懲罰嗰個呀😂

當人人都認為西西弗斯被罰要喺地獄推大石上山係一種折磨，但西西弗斯並唔係咁諗，佢喺不幸之中搵到意義。舉辦畫展嘅兩位藝術家鄭璧孌Kian同葉露珠Kristy認為香港人過去一年同西西弗斯都有相似嘅地方，因為呢一年都重複做緊看似徒勞無功嘅事，但大家都搵到意義，仲無放棄。

儘管形式不同，我們都在重覆地做著這件事

Kian & Kristy

小編得知呢個展覽，係因為早前喺深水埗合舍睇《微光之城》展覽時拎到《西西弗斯的不撓》畫展嘅邀請卡。邀請卡上無透露展覽同香港抗爭運動有關，但就有一句「儘管形式不同，我們都在重覆地做著這件事」。呢句嘅意思其實就即係「兄弟爬山，各自努力」。我哋每一個人都係西西弗斯，兩位藝術家希望透過畫展，寄語港人繼續努力做自己認為啱嘅事，堅持落去。

Kian同Kristy嘅作品風格都好唔同，Kian其中兩幅作品用咗image transfer嘅手法，紀錄低被撕走嘅連儂牆同埋被抹走嘅街道塗鴉，再喺上面加上顏料同設計。圖中呢一幅叫《停不了的動力》，灰色嘅街道上面有唔同嘅字句，地上嘅血跡非常吸引眼球，Kian表示血跡除咗代表警暴，亦代表咗無血嘅暴力。而Kristy嘅作品就比較含蓄，三幅作品都同「夢境」有關，畫中都有海浪入侵，觀眾可以有想像空間去思考箇中嘅意思。

睇完畫展後小編同Kian交流咗唔少對呢一場運動嘅睇法，Kian表示會繼續用自己嘅方式創作，無人知道一年後嘅香港會係點，正如去年可以參與維園六四晚會，今年已經被政府用限聚令禁止，《國安法》仲令香港帶嚟更多未知。希望人人都可以學識李小龍名言「Be Water」嘅意思，喺抗爭中搵到自己嘅長處同位置。

直到有一日，佢發現佢可以蔑視自己嘅命運，甚至用享受呢個過程嚟去否定諸神對佢嘅懲罰，於是，佢感覺到自己係快樂嘅。

《西西弗斯之歌》 – My Little Airport

最後，小編想以My Little Airport《西西弗斯之歌》嘅最後一句歌詞作結，和你抗爭，我很愉快。